Viveiro, 10 de novembro de 2026. O Concello de Viveiro mantivo este luns unha reunión con representantes das asociacións de nais e pais do alumnado (ANPA) dos diferentes centros educativos do municipio para abordar as súas necesidades e as posibles vías de colaboración municipal.
Durante a xuntanza trasladouse ás asociacións a previsión de incluír nos orzamentos municipais de 2027 unha subvención nominativa de 500 euros para cada ANPA.
Así mesmo, abordouse a posibilidade de habilitar unha liña complementaria de financiamento mediante un procedemento de concorrencia competitiva. Esta segunda modalidade permitiría ás asociacións solicitar axudas adicionais en función das actividades e dos servizos que desenvolvan.
Entre os posibles conceptos que se poderían ter en conta figuran os servizos de madrugadores e comedor, a contratación de persoal coidador, a organización de actividades educativas, as excursións e os gastos de transporte.
A contía destinada a esta liña complementaria aínda está pendente de determinar. Tamén deberán definirse os requisitos e criterios de valoración, que se recollerían nunhas bases públicas para garantir a transparencia e a igualdade de acceso das asociacións interesadas.
Durante a reunión tratouse a elaboración dun borrador destas bases, que deberá concretarse antes de iniciar calquera procedemento de solicitude.
Segundo a planificación exposta no encontro, o obxectivo sería poder avanzar na definición desta liña de axudas durante o primeiro trimestre de 2027, unha vez determinada a súa dotación económica e completados os trámites correspondentes.