Viveiro é un dos cinco municipios de España seleccionados dentro da rede Spain Culinary Villages para o desenvolvemento do turismo gastronómico e sostible.
O proxecto ADN Gastronómico Viveiro pretende definir e promover a identidade culinaria e o desenvolvemento local do municipio a través da alimentación.
A axencia de innovación alimentaria Prato_DO e o equipo ADN Sapiens, spin-off de elBullifoundation, desenvolverán o proxecto aplicando a innovadora metodoloxía Sapiens, creada por Ferran Adrià.
Viveiro, 26 de agosto de 2025.
O Concello de Viveiro, da man de Prato DO, está a impulsar o proxecto “ADN Gastronómico Viveiro” co obxectivo de identificar e poñer en valor a singular identidade culinaria do municipio. Viveiro é un dos cinco concellos de España seleccionados pola súa marcada personalidade gastronómica dentro da rede Spain Culinary Villages, iniciativa que escolle e acompaña a municipios singulares de todo o Estado para fortalecer a súa identidade culinaria e converter a alimentación en motor de desenvolvemento local sostible, sendo Viveiro o único representante galego.
Viveiro, un concello referente pola súa riqueza gastronómica
Viveiro destaca polo seu profundo legado gastronómico e cultural. A vila, de marcada esencia mariñeira e cun dos cascos históricos máis fermosos da costa norte, conserva unha oferta culinaria enraizada na cociña tradicional, cun receitario atemporal e ao mesmo tempo actualizado. Porén, tamén se enfronta aos desafíos da globalización e da perda de identidade gastronómica.
Desde 1970, Viveiro alberga un dos grandes templos do produto mariño en España: o Restaurante Nilo, da familia Balseiro, recoñecido con 2 Soles Repsol e distinguido en Madrid Fusión como unha das seis mellores marisquerías do país. Xunto a el, destacan eventos de longa tradición como a Romaría do Bo Xantar de Naseiro ou a Festa da Merluza de Celeiro, así como espazos emblemáticos como a Praza de Abastos — Pescadería, recentemente visitada polo chef José Andrés, quen destacou a calidade excepcional do peixe ali atopado durante a súa estadía de tres xornadas. Todo isto converte a Viveiro nun destino gastronómico de referencia en Galicia e no conxunto de España.
O proxecto ADN Gastronómico Viveiro: gastronomía como eixo de desenvolvemento local.
O ADN Gastronómico Viveiro non é só un proxecto turístico. A súa vocación principal é empregar a gastronomía e a alimentación como elementos transversais de desenvolvemento local, recoñecendo que constitúen o principal expoñente da economía viveirense e un factor clave para a súa diversificación e resiliencia.
A través deste proxecto, o Concello de Viveiro e Prato_DO buscan fortalecer a economía local, valorizar os sectores produtivos primarios e a hostalaría, xerar novas oportunidades de emprego e contribuir a fixar poboación no territorio. O turismo gastronómico convértese así nun activador, pero sempre ao servizo dun obxectivo máis amplo: a sustentabilidade económica, social e cultural de Viveiro.
Análise, innovación e compromiso co territorio.
Prato_DO, axencia de innovación alimentaria con sede en A Mariña, leva desde 2013 impulsando proxectos creativos para transformar a forma en que nos alimentamos, sempre cun enfoque sostible e comprometido co territorio. Entre as súas iniciativas destacan Cociñando A Mariña Lucense, para a Mancomunidade, ou o recén creado A Mariña Lab, apoiado pola Área Rural da Vicepresidencia da Deputación de Lugo.
A súa experiencia en investigación, divulgación e deseño de estratexias gastronómicas fixo posible a análise e diagnose previas, así como a creación do ADN Gastronómico Viveiro, asentando as bases do proxecto e liderando o seu desenvolvemento como ferramenta de transformación local.
Colaboración innovadora coa metodoloxía Sapiens creada por Ferran Adrià e o seu equipo.
Un dos aspectos máis innovadores é a incorporación da metodoloxía Sapiens, unha ferramenta de análise integral creada no seo de elBullifoundation e que Prato DO xa leva anos aplicando nos seus proxectos.
A conexión foi posible grazas ao deseñador Luki Huber, colaborador de Ferran Adrià, a quen Lucas Requejo, fundador e director de Prato_DO, coñeceu a través de Antonio
Barrera, director do Festival Internacional Food Design. Esta alianza estratéxica, con proxección de accións futuras, supón un aval de innovación e calidade para Viveiro.
O equipo de ADN Sapiens en Viveiro
O proxecto contará coa participación directa do equipo ADN Sapiens, spin-off de elBullifoundation formado por profesionais bullinianos especializados en innovación e na aplicación da metodoloxía Sapiens:
- Silvia Timón, experta en marketing, innovación e metodoloxía Sapiens, formadora e poñente, colaboradora en proxectos de elBullifoundation e cofundadora de dúas das súas spin-off.
- Gabriel Bartra, cociñeiro e xornalista gastronómico, director gastronómico no MACC (Madrid Culinary Campus) e director de contidos de elBullifoundation e da
- Silvia Sánchez, innovation manager e cofundadora de Thinknovate, traballou con Ferran Adrià en proxectos de I+D+i e conta cunha ampla traxectoria en innovación
- Auri García, xornalista e coautor da obra Metodoloxía Sapiens, coordinou con Ferran Adrià o proxecto editorial de Sapiens e foi recoñecido polos European Newspaper Awards.
A súa participación achega unha visión internacional e metodolóxica única, que permitirá analizar o ADN gastronómico de Viveiro desde unha perspectiva innovadora e recoñecida a nivel global.
Presentacións e próximos pasos.
Co obxectivo de dar a coñecer o avance do proxecto Spain Culinary Villages e a singularidade do ADN Gastronómico Viveiro, o Concello de Viveiro realizará unha primeira presentación aos medios nos próximos días.
Posteriormente, o 22 de setembro celebrarase a presentación oficial e as xornadas inspiracionais, dirixidas aos membros do ecosistema gastronómico de Viveiro. O acto contará coa presenza de referentes como lago Pazos (Abastos), chef innovador e empresario gastronómico comprometido co local, que transformou a concepción sobre a cociña galega contemporánea e o tecido económico e cultural da súa contorna. O equipo ADN Sapiens estará representado por Silvia Sánchez e Silvia Timón , e convidarase a todos os axentes vinculados á gastronomía local. Será unha oportunidade para compartir coñecemento, reflexionar colectivamente e fortalecer a rede arredor da gastronomía viveirense.
Chamada á cidadanía.
Anímase á veciñanza a achegar receitas familiares, fotografías antigas ou imaxes actuais da Romaría do Bo Xantar ao correo: adngastronomicoviveiro@gmail.com. Todas as contribucións enriquecerán este proxecto colectivo e pasarán a formar parte do legado gastronómico das vindeiras xeracións.