Viveiro, 27 de agosto de 2025. A alcaldesa de Viveiro, Mariña Gueimunde, mantivo esta mañá unha reunión coa directora xeral de Estratexia Industrial e Solo Empresarial da Xunta de Galicia, Margarita Ardao, co obxectivo de analizar as posibilidades de dispoñer de novo solo empresarial no municipio.
No encontro tamén participou o concelleiro de Economía e Facenda, Obras, Industria, Mercados e Medio Ambiente, Martín Vale, que incidiu na necesidade de contar con infraestruturas que dean resposta ás demandas actuais do tecido empresarial e permitan atraer novos proxectos.
Durante a reunión, a rexedora trasladou á representante autonómica a importancia de contar con espazos axeitados para favorecer o asentamento de empresas en Viveiro, así como para apoiar a ampliación daquelas que xa operan na zona. Segundo destacou Gueimunde, “é fundamental que Viveiro poida ofrecer alternativas de solo industrial que permitan xerar novas oportunidades de emprego e fixar poboación no noso concello”.
Pola súa banda, a directora xeral explicou os instrumentos que a Xunta está a desenvolver nesta materia, como as Zonas de Aceleración de Proxectos Empresariais e Solo (ZAPES), pensadas para dar resposta rápida a proxectos que precisan dispoñibilidade inmediata de solo, e as Zonas Industriais Rurais (ZIR), destinadas a iniciativas de menor dimensión en contornos rurais.
O Concello de Viveiro seguirá traballando en coordinación coa administración autonómica para avanzar nas opcións máis axeitadas e adaptadas ás necesidades do tecido empresarial local.
“Queremos que Viveiro sexa un concello atractivo para investir, crear emprego e desenvolver proxectos de futuro. Para iso é imprescindible contar co apoio doutras administracións e con ferramentas eficaces para poñer solo empresarial a disposición das compañías”, concluíu a alcaldesa.