Viveiro, 8 de xuño de 2026. O persoal municipal do Concello de Viveiro está a recibir hoxe e mañá unha formación específica para o uso de desfibriladores semiautomáticos. Esta acción formativa desenvólvese despois da recente instalación dun desfibrilador semiautomático externo (DESA) nas dependencias da Casa do Concello, unha medida coa que se busca mellorar a capacidade de resposta ante posibles situacións de emerxencia sanitaria.

Co obxectivo de garantir o uso axeitado deste dispositivo, varios empregados municipais están a recibir unha formación específica que lles permitirá actuar correctamente no caso de que sexa preciso empregar o desfibrilador.

Desde o Concello de Viveiro sublíñase a importancia de combinar a dispoñibilidade deste tipo de equipamentos coa preparación adecuada do persoal, co fin de ofrecer unha resposta máis rápida e eficaz ante unha eventual emerxencia.