Concello de Viveiro

ConcelloFestasXuventude

Viveiro conmemora o Día Mundial da Infancia con actividades de participación xuvenil, sensibilización e lecer

Tres representantes do Grupo de Participación Xuvenil Contra a Marea asistirán ao XIV Foro Galego de Participación Infantil e Adolescente no Parlamento de Galicia. A programación complétase cun obradoiro audiovisual sobre corresponsabilidade e unha festa infantil no Pavillón Antonio Tarrío.

Viveiro, 18 de novembro de 2026. O Concello de Viveiro conmemorará o Día Mundial da Infancia, que se celebra o 20 de novembro, cunha programación de actividades centrada na participación infantil e xuvenil, a sensibilización e o lecer.

As propostas inclúen a participación de representantes da mocidade viveirense no XIV Foro Galego de Participación Infantil e Adolescente, a celebración dun obradoiro de creación audiovisual sobre corresponsabilidade e unha xornada de actividades infantís no Pavillón Antonio Tarrío.

Participación no Parlamento de Galicia

O venres 20 de novembro, o Concello de Viveiro participará no XIV Foro Galego de Participación Infantil e Adolescente, organizado por UNICEF Comité Galicia e que terá lugar no Parlamento de Galicia.

Esta iniciativa enmárcase no programa Cidades Amigas da Infancia, do que Viveiro forma parte desde que obtivo o recoñecemento en 2025.

Nesta edición participarán tres representantes do Grupo de Participación Xuvenil Contra a Marea, un dos cales exercerá como voceiro ante o pleno do Parlamento para defender o dereito á igualdade, á inclusión e á non discriminación.

Os tres representantes estarán acompañados por Lorena Mera, responsable da Oficina Municipal de Información Xuvenil (OMIX) do Concello de Viveiro, e pola alcaldesa, Mariña Gueimunde, que tamén asistirán ao encontro.

A participación neste foro permitirá que a mocidade de Viveiro traslade as súas reflexións e propostas a un espazo de diálogo no que se abordan cuestións relacionadas cos dereitos da infancia e da adolescencia.

Obradoiro audiovisual sobre corresponsabilidade

Tamén o venres 20 de novembro desenvolverase a primeira parte dun obradoiro de sensibilización sobre a corresponsabilidade a través da creación audiovisual, dirixido á mocidade e enmarcado no Programa Corresponsables.

A actividade terá lugar no Espazo Xove de Viveiro, co obxectivo de achegar esta iniciativa ao maior número posible de mozos e mozas e favorecer un espazo de encontro e participación.

Baixo a proposta «Achégate co teu móbil e crea a túa curta», as persoas participantes poderán empregar a creación audiovisual como ferramenta para reflexionar sobre a corresponsabilidade e transmitir as súas propias mensaxes.

Festa infantil no Pavillón Antonio Tarrío

A programación continuará o sábado 21 de novembro, cunha tarde de actividades infantís no Pavillón Antonio Tarrío, en horario de 17:00 a 20:00 horas.

A xornada contará con inchables, láser tag e obradoiros, con propostas de lecer para nenos e nenas de diferentes idades.

A actividade de láser tag está recomendada a partir dos 9 anos, polo que a programación inclúe tamén unha alternativa para a rapazada de maior idade.

Esta celebración recupera a proposta de lecer infantil prevista inicialmente para o Samaín, que tivo que ser cancelada.

Con estas tres actividades, a conmemoración do Día Mundial da Infancia en Viveiro reunirá iniciativas relacionadas coa participación da mocidade, a igualdade e o dereito ao xogo e ao lecer.